इरानलाई परमाणु वारहेड दिन रुस तयार, युद्ध झनै भयानक हुने खतरा

 धनगढी,९ असार । अमरिकाले इरानका परमाणु ऊर्जा संयन्त्रलाई निसाना बनाएपछि रुसले कडा प्रतिक्रिया दिएको छ । रुसको सुरक्षा परिषद्का उपाध्यक्ष तथा पूर्वराष्ट्रपति दिमित्री मेदभेदेवले अमेरिकालाई चेतावनी दिँदै अब केही देश इरानलाई सिधा आफ्नो परमाणु वारहेड दिन तयार रहेको बताएका छन् ।

मेदभेदेवले एक्समा लेख्दै अमेरिकी हमला असफल भएको र इरानको परमाणु संरचना सुरक्षित रहेको समेत दाबी गरेका छन् । मेदभेदेवले यो हमलाले अब इरानको परमाणु महत्त्वाकांक्षालाई रोक्नुको साटो झनै तीव्र पार्नेसमेत उल्लेख गरेका छन् ।

 उनले अमेरिकाको सैन्य र कूटनीतिक रणनीति उल्टो परेको भन्दै इरानको सत्ता झनै बलियो बन्ने बताएका छन् । युक्रेन युद्धमा रुसलाई ठूलो मात्रामा ड्रोन, मिसाइल र अन्य हतियारले सहयोग गरेको इरानलाई इजरायलविरुद्धको युद्धमा रुसले सहयोग गरेमा युद्ध झनै भयानक हुने खतरा हुन्छ ।

इरानले इजरायलमाथि सोमबार पनि १५ भन्दा बढी ब्यालिस्टिक मिसाइलले हमला गरेको छ । करिब ४० मिनेटमा इरानले इजरायलमाथि लगातार मिसाइल प्रहार गरेको हो । इरानले इजरायलका सफेद, तेल अभिभ, अश्कलोन, अशदोद र बेइसन शहरमा रकेटले निसाना बनाएको जनाएको छ । इरानी हमलापछि इजरायलका केही शहरमा विद्युत् आपूर्ति ठप्प भएको छ ।

इजरायल इलेक्ट्रिक कर्पोरेसनले एक रणनीतिक संरचनामा हमला गरेको र शहरमा विद्युत् आपूर्ति ठप्प भएको पुष्टि गरेको छ । इरानले इजरायली सेनासँग सम्बन्धित कम्पनीमा साइबर हमलासमेत गरेको छ । यसबाट इजरायलका प्रमुख सैन्य र परमाणु अड्डाबारे जानकारी प्राप्त भएको र भविष्यमा हमला गर्ने सम्भावित स्थान भएको इरानले जनाएको छ ।