चैत सुरु भएसँगै सुदूरपश्चिममा भिटौला पर्व सुरु

धनगढी,  १ चैत  / चैत महिना सुरु भएसँगै सुदूरपश्चिमभरि भिटौला पर्व सुरु भएको छ। भाइबहिनीको प्रेम झल्काउने यो पर्वमा बिहे भइसकेकी चेलीबेटीलाई माइती पक्षका दाजुभाइले भेट्ने चलन छ।

बैतडी, दार्चुला, बझाङ, कैलाली र कञ्चनपुरका साथै सीमावर्ती भारतीय गाउँहरूमा पनि यो परम्परा प्रचलित छ। चैत महिनामा खाद्यान्न अभाव हुने भएकाले माइतीले छोरीबहिनीको घरमा खानेकुरा र कोसेली लिएर जाने चलन रहिआएको छ।

भिटौलोमा सेलरोटी, खीर, मालपुवा, गुड, फलफूल तथा लुगाकपडा लगेर दिने गरिन्छ। माइतीबाट आएको कोसेली छिमेकमा बाँड्ने चलन पनि छ।

भाइटीकामा दिदीबहिनी माइत जाने र चैतमा दाजुभाइले दिदीबहिनीको घर पुगेर भेट्ने परम्पराले भाइबहिनीको सम्बन्ध अझै नजिक बनाउने विश्वास गरिन्छ।