बेहडाबाबामा बिहिबारदेखी गंगादशहरा मेला, सडक मर्मत र बत्ती जडान

  धनगढी,२० जेठ ।  कैलालीको धनगढीमा रहेको बेहडाबाबा मन्दिरमा बिहिबारदेखि गंगादशहरा मेला सञ्चालन हुने भएको छ। रामपुरस्थित बेहडाबाबा मन्दिरमा गंगादहरा मेला सुरु हुने भएपछि धनगढी उपमहानगरपालिकाले सडक मर्मत, बत्ती जडान लगायतको तयारी गरेको छ। गंगादशहरा मेलामा भक्तजनहरुको सहजताका लागि सडक बत्ती जडान गरिएको हो। धनगढी उपमहानगरपालिका–७, देवहरीयादेखि बेहडाबाबा मन्दिरसम्म सडक बत्ती जडान गरिएको छ। सडकसमेत मर्मत गरिएको छ। कालोपत्र गर्न बाँकी रहेको सडकमा धनगढी उपमहानगरपालिकाले मर्मत गरेको हो।

धार्मिक आस्थाको केन्द्र बेहडाबाबा मन्दिरमा पूजाका लागि भारतबाटसमेत भत्तजनहरू आउने गरेका छन्। उनीहरूले उत्पादन गरेको अन्नसमेत बेहडाबाबामा दान गर्दै आएका छन्। परापूर्वकालमा त्यहाँ शिवलिङ्ग उत्पत्ति भएपछि मन्दिर स्थापना गरिएको कथन छ। शिव लिंगको उचाइ अहिले करिब सात फिट छ। श्रद्धालुहरू मौनी अमवस्या, शिवरात्रि र गंगा दशहरामा बेहडाबाबाको दर्शन गर्न आउने गर्छन्।