कैलालीमा ज्यानमार्ने उद्योगका फरार प्रतिवादीलाई प्रहरीले हान्यो गोली

धनगढी, २९ जेठ / कैलालीको भजनी नगरपालिका–७ मा प्रहरीले फरार प्रतिवादीमाथि गोली चलाएको छ। जिल्ला प्रहरी कार्यालयका प्रवक्ता प्रहरी नायब उपरीक्षक राजकुमार सिंहले बिहीबार दिउँसो भजनी नगरपालिकामा गोली चलेको पुष्टि गरेका छन् ।

उनकाअनुसार टीकापुरमा गत जेठ १५ गते स्थानीय टेकेन्द्र सिंह विष्टमाथि खुकुरी प्रहार भएको घटनामा कैलारी गाउँपालिका–२ को शिवरत्नपुरबाट दुई जनालाई पक्राउ गरिएको थियो ।

भजनी क्षेत्रमा पुग्दा उनीहरु भाग्न खोजेपछि प्रहरीले गोली चलाउनुपरेको डीएसपी सिंहले बताए । गोली प्रहार गरेर दुवै जनालाई नियन्त्रणमा लिइएको छ । नियन्त्रणमा लिइएकामा टीकापुरका रिदम ढुङ्गाना र मिलन चन्द रहेका छन् ।

उनीहरुलाई नियन्त्रणमा लिन प्रहरीले दुई राउण्ड हवाई फायर र दुई वटा गोली प्रहार गर्नुपरेको जनाएको छ । गोली प्रहारबाट दुवै जनाको घुडामुनी चोट लागेको छ । उनीहरुलाई उपचारका लागि सेती प्रादेशिक अस्पताल धनगढीमा उपचार भै रहेको छ ।