शुक्लाफाँटा राष्ट्रिय निकुञ्जमा पाटे बाघको संख्या ४३ पुग्यो

धनगढी,१३ साउन । कञ्चनपुरमा रहेको शुक्लाफाँटा राष्ट्रिय निकुञ्जमा पाटे बाघको संख्या ४३ पुगेको छ । मंगलवार विश्व बाघ दिवसको अवसरमा शुक्लाफाँटा राष्ट्रिय निकुञ्जमा आयोजित एक विशेष कार्यक्रममा बाघ अनुगमनको नतिजा सार्वजनिक गर्दै पाटे बाघको संख्या ४३ पुगेको घोषणा गरिएको हो ।

२०८१ कार्तिक १८ देखि पौष १० सम्म सञ्चालन गरिएको विस्तृत अनुगमनबाट उक्त नतिजा प्राप्त भएको जनाइएको हो । यो गणना नेपाल सरकारले जारी गरेको बाघ तथा आहारा प्रजातिको अनुगमन प्रोटोकलमा आधारित रहेर गरिएको थियो ।

निकुञ्जमा २१ वटा भाले र १९ वटा पोथी बाघ क्यामेराका आधारमा गणना भएका, यसबाहेक फिल्डमा खटिएका प्राविधिकहरूले प्रत्यक्ष देखेका तर क्यामेरामा कैद नभएका थप ३ वटा बाघलाई समेत जोडेर कुल संख्या ४३ पुगेको निकुञ्जले जनाएको छ ।

शुक्लाफाँटा राष्ट्रिय निकुञ्ज, जेडएसएल नेपाल, हिमालयन नेचर लगायतका संस्थाहरूको संयुक्त आयोजनामा भएको कार्यक्रममा निकुञ्जका प्रमुख संरक्षण अधिकृत, संरक्षणकर्मी, नेपाली सेना, विभिन्न सहयोगी संस्थाका प्रतिनिधि तथा सञ्चारकर्मीहरूको उपस्थिति रहेको थियो ।