कैलालीका एसपी बालनरसिंह राणा केन्द्र तानिँदै

धनगढी,२९ साउन । जिल्ला प्रहरी कार्यालय कैलालीका प्रहरी प्रमुख एवं एसपी बालनरसिंह राणा केन्द्रमा तानिने भएका छन्। प्रहरी प्रधान कार्यालयले उनलाई केन्द्रमा तान्न लागेको हो।

बुधबार गृह मन्त्रालयले कैलालीका प्रमुख जिल्ला अधिकारी (सीडीओ) गोगनबहादुर हमाललाई मन्त्रालयमा तानेको थियो। लगत्तै प्रहरी प्रधान कार्यालयले पनि एसपी राणालाई केन्द्रमा बोलाउने तयारी गरेको हो। गृहको निर्देशनानुसार प्रहरी प्रधान कार्यालयले एसपी राणालाई तान्न लागेको जनाइएको छ।

साउन २३ राति कैलाली जिल्ला कारागारमा कैदीबन्दीबीच झडप हुँदा हुँदा एकजनाको मृत्यु भएको थियो। उक्त झडपमा ४८ जना घाइते भएका थिए। उक्त घटनामा सुरक्षा समन्वयमा कमजोरी देखिएकाले सीडीओ र एसपी दुवैलाई तान्नुपर्ने अवस्था आएको गृह स्रोतको भनाइ छ। एसपी राणालाई आजभोलि फिर्ता बोलाउने तयारी भएको बताइन्छ। राणाले २०८२ वैशाख २३ गते कैलाली प्रहरीको कमाण्ड सम्हालेका थिए।

कैदीबन्दी आक्रामक बन्दा दुई दिनसम्म अवस्था तनावपूर्ण बनेको थियो। मानव अधिकार आयोगको टोलीले पनि कारागार निरीक्षण गरेको थियो।

उक्त घटनामा चौधरीमाथि आक्रमण गरेर हत्या गर्ने कैदीबन्दीको पहिचान गरेर कारवाहीको दायरामा ल्याउन माग गर्दै जिल्ला प्रहरी कार्यालयमा उनको परिवारले जाहेरी पनि दिएको छ।