कैलाली, कञ्चनपुर बाट करिब डेढ लाख बराबरका भन्सार छलीका सामान बरामद

धनगढी,८ भदौ । प्रहरीले करिब डेढ लाख बराबरका भन्सार छलीका सामान बरामद गरेको छ । शनिबार कैलाली र कञ्चनपुरबाट प्रहरीले अन्दाजी १ लाख ४४ हजार८६० रुपैया बराबरका भन्सार छलीका सामान बरामद गरेको हो ।

सुदूरपश्चिम प्रदेश प्रहरी कार्यालयका अनुसार कैलालीबाट इलाका प्रहरी कार्यालय टीकापुरबाट खटिएको प्रहरी गस्ती टोलीले ९४ हजार मुल्य बराबरका सामान बरामद गरेको छ ।

प्रहरीका अनुसार जिल्लाको टीकापुर नगरपालिका– ९ दसगजा सामुदायिक बनस्थित जंगलमा भारतबाट अवैध रुपमा भन्सार छली गरी ल्याईएका समान बरामद गरिएको हो । बरामद गरिएका सामानहरुमा कुर्ता सुरुवाल, ट्राउजर, टिसर्ट लगायत रहेको प्रहरीले बताएको छ ।

यस्तै कञ्चनपुरबाट प्रहरीले ५० हजार ८६० रुपैया बराबरका सामान बरामद गरेको छ । जिल्लाका भिमदत्त नगरपालिका– १७ मझगाँउ नहर नजिक र दोधारा चाँदनी नगरपालिका– ७ कञ्चभोज स्थित सडक किनाराबाट अबैंध रुपमा भारतबाट भन्सार छलि गरि ल्याएका सामानहरु बरामद गरिएको प्रहरीले जनाएको छ ।

प्रदेश प्रहरी कार्यालयका अनुसार बरामद गरिएका सामग्रीहरुमा सुजी, पेय पदार्थ, बच्चाका खेलौना, प्लाष्टर पट्टी लगायत रहेका छन । उक्त सामान जिल्ला प्रहरी कार्यालय कञ्चनपुर मातहत कार्यालयबाट खटिएको प्रहरी गस्ती टोलीले बेबारिसे अवस्थामा फेला पारेको बताईएको छ ।