भूस्वर्ग खप्तडमा पर्यटकलाई खान बस्न अब छैन समस्या

धनगढी/ सुदूरपश्चिमका चार जिल्ला बझाङ, बाजुरा, डोटी र अछामसँग जोडिएको छ, धर्तीको स्वर्ग ९भूस्वर्ग० खप्तड । अनेक विविधता र अलौकिक सुन्दरताले भरिपूर्ण खप्तड जुनसुकै समयमा पनि घुम्न सकिन्छ । तर, चैतदेखि कात्तिकसम्म घुम्नका लागि उपयुक्त समय मानिन्छ ।

धार्मिक र पर्यापर्यटनको अपार सम्भावना रहे पनि विगतमा पूर्वाधारको अभावमा खप्तडमा अपेक्षाकृत रूपमा पर्यटक पुग्न सकेका थिएनन् । केही वर्षअघिसम्म त्यहाँ पर्यटकका लागि आधारभूत सुविधाको समेत अभाव थियो । तर, पछिल्लो समयमा खप्तडमा पर्यटकलाई आधारभूत सुविधा उपलब्ध गराउनका लागि धमाधम पूर्वाधार बनाउन थालिएको छ । खप्तड पर्यटन विकास तथा व्यवस्थापन समितिका अनुसार खप्तडमा १ सय ५० जनासम्मलाई खाना खुवाउन सक्ने होटल सञ्चालनमा छन् । ५० जनासम्म बास बस्न सक्ने सुविधा पनि तयार भएको छ ।

खाना र बासको सुविधा तयार भएसँगै आन्तरिक पर्यटकको आगमन पनि बढ्न थालेको छ,’ खप्तड पर्यटन विकास तथा व्यवस्थापन समितिका कार्यकारी निर्देशक खेमराज जोशीले भने, ‘अहिले खप्तडमा दैनिक १५ देखि २५ जनासम्म आन्तरिक पर्यटक पुग्न थालेका छन् । प्रचारप्रसारको अभावमा विदेशी पर्यटक भने निकै कम आएका छन् ।’

खप्तड जानका लागि मुख्य दुई मार्ग प्रयोग हुँदै आएका छन् । मुख्यतः बझाङ र डोटी जिल्लाबाट खप्तडमा आउजाउ गर्ने गरिएको छ । डोटीबाट खप्तड राष्ट्रिय निकुञ्ज जाँदा निकुञ्जको गेट ९झिग्राना० सम्म कालोपत्रे सडक निर्माण गरिएको छ । झिग्रानाबाट खप्तड पुग्न १६ किलोमिटर पैदल यात्रा गर्नुपर्छ ।

झिग्रानादेखि ७ किलोमिटर पैदल यात्रापछि पुगिन्छ बिचपानी, जहाँ पर्यटकका लागि खाना र बस्ने सुविधा छ । त्यहाँ होटल बिचपानी सञ्चालनमा छ भने पर्यटन बोर्डले २० बेड क्षमताको गेस्ट हाउस निर्माण गरेको छ । बिचपानीबाट खप्तड पुग्न ९ किलोमिटर पैदल यात्रा गर्नुपर्छ ।

खप्तडमा निजीक्षेत्रबाट होटल सञ्चालनमा छ । खप्तडमा ५० बेडको होटल सञ्चालन गरिरहेका लोकबहादुर रावलले खाना र बस्नका लागि सुविधा नभएर पर्यटकले फर्किनुपर्ने बाध्यता अब हटेको बताए । ‘अहिले खप्तड घुम्न आउने पर्यटकलाई खान बस्न कुनै समस्या छैन,’ उनले भने, ‘हामीले स्थानीय उत्पादनमा आधारित पोषणयुक्त खानाको व्यवस्था गरेका छौँ । स्थानीय उत्पादन गहुँ, कोदो, मकै, तरकारी, दाल, चामल, दही, दूध, घ्युबाट बनेका अर्ग्यानिक खानाको व्यवस्थापन गरिएको छ ।’ रावलले राष्ट्रिय निकुञ्जको गेस्ट हाउस भाडामा लिएर होटल सञ्चालन गरिरहेका हुन् ।

नेपाल पर्यटन बोर्डले पनि खप्तडमा गेस्ट हाउस निर्माण गरिरहेको छ । होटल व्यवसायी संघ सुदूरपश्चिमका पूर्वअध्यक्षसमेत रहेका खप्तड होमस्टेका सञ्चालक दीपकबहादुर खड्काका अनुसार पर्यटन बोर्डबाट निर्माण भइरहेको गेस्ट हाउसको निर्माण अन्तिम चरणमा पुगेको छ । ‘पाँच करोड लगानीमा ८० बेड क्षमताको गेस्ट हाउस निर्माण भइरहेको हो,’ उनले भने ।

खप्तड पर्यटन विकास तथा व्यवस्थापन समितिका कार्यकारी निर्देशक जोशीले खप्तडमा बनिरहेको गेस्ट हाउसको ९५ प्रतिशत काम सम्पन्न भएको बताए । ‘यस वर्ष बजेट विनियोजन भइसकेको हुँदा यसै आर्थिक वर्षभित्र सम्पन्न गरी सञ्चालनमा ल्याउने तयारी छ,’ उनले भने ।