खुलेन सुर्नयामा लागेको ताला

धनगढी । बैतडीको सुर्नया गाउँपालिकामा गरिएको तालाबन्दी एक हप्ता बितिसक्दा पनि खुल्न सकेको छैन । समयमै सूचना नदिएको र गाउँपालिकाले आफ्ना माग सम्बोधन नगरेको भनेर गएको शुक्रबार गाउँपालिकाको कार्यालयमा जेनजी समूहले तालाबन्दी गरेको थियो । तालाबन्दी गरेको समूहले जिल्ला समन्वय समिति, जिल्ला प्रशासन र कार्यापालिकाको टिम र पालिकाका कर्मचारीसँग छलफल गरेर समस्या समाधान गरेपछि ताला खोल्ने बताएको थियो । शुक्रबार कार्यपालिकाका पदाधिकारी, जिल्ला समन्वय समितिको टिम र जेनजी समूहबीच छलफल भएको थियो ।

छलफलमा आफूहरूले राखेका माग जनप्रतिनिधिहरूले सम्बोधन गर्न नचाहेको र आलटाल गर्न खोजेकाले छलफल बिनानिष्कर्ष टुंगिएको जेनजी समूहका अगुवा विशाल भट्टले बताए । ‘जबसम्म स्पष्ट रुपमा हाम्रा माग सम्बोधन हुँदैनन्, त्यतिन्जेलसम्म ताला खुल्दैन,’ उनले भने । छलफल सकारात्मक भएको र युवाहरूले राखेका १० मागमध्ये सातवटामा सहमति जुटिसकेको पालिका अध्यक्ष अमर कुँवरले बताए । ‘युवाहरूका जायज माग पूरा गर्छौं,’ उनले भने, ‘केहीमा सहमति भइसकेको छ । अब बाँकीमा छलफल गरेर सहमति गरिने र उनीहरूले माग गरेका सूचना दिन मिल्ने जति कुरामा सूचना दिन्छौं ।’